Uşağın ölümünə səbəb olan sürücünün cinayət işi məhkəməyə göndərilib

Bakıda ölümlə nəticələnən yol-nəqliyyat hadisəsi törətməkdə təqsirləndirilən Məhiyəddin Ağakişiyevin cinayət işi üzrə ibtidai istintaq başa çatıb. Avtosfer.az-ın "Report"a istinadən xəbərinə görə, cinayət işi baxılması üçün Suraxanı Rayon Məhkəməsinə göndərilib və hakim Ceyhun Qədimovun icraatına verilib.

Məhkəmənin hazırlıq iclasının vaxtı hələlik təyin olunmayıb.

Qeyd edək ki, hadisə ötən ilin aprel ayında Qaraçuxur qəsəbəsində baş verib. 2010-ci il təvəllüdlü Əhmədzadə Vaqif Ağa oğlu idarə etdiyi velosipedlə M.Ağakişiyevin idarə etdiyi “Mersedes Sprinter” markalı avtomaşının altına girib. Nəticədə 8 yaşlı uşaq hadisə yerindəcə dünyasını dəyişib.

Xatırladaq ki, V.Əhmədzadə 141 saylı orta məktəbin 1-ci sinif şagirdi olub.