Yasamalda ölümlə nəticələnən yol qəzası ilə bağlı məhkəmə başlayır

Yasamal rayonunda ölümlə nəticələnən yol-nəqliyyat hadisəsi törətməkdə təqsirləndirilən Vidadi Rüstəmovun cinayət işi üzrə ibtidai istintaq başa çatıb. Avtosfer.az-ın "Report"a istinadən xəbərinə görə, cinayət işi baxılması üçün Yasamal Rayon Məhkəməsinə göndərilib. Hakim Hüseyn Səfərovun icraatında olan iş üzrə hazırlıq iclası yaxın günlərdə keçiriləcək.

Hadisə bu ilin may ayında Bakı-Sumqayıt şossesinin Yasamal rayonu ərazisinə düşən hissəsində baş verib.

Nəticədə avtomobildə olan sərnişin - 1978-ci il təvəllüdlü Məmmədov Xəyyam Haqverdi oğlu hadisə yerində dünyasını dəyişib, digər sərnişinlər isə müxtəlif dərəcəli bədən xəsarətləri alıblar.

Qeyd edək ki, hər üç şəxs Rusiyadan Bakıya gəlirmiş.

Təqsirləndirilən şəxsə Cinayət Məcəlləsinin 263.2-ci (yol hərəkəti və nəqliyyat vasitələrinin istismarı qaydalarını pozma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham verilib.