Şamaxı-İsmayıllı yolunda "Audi" yandı - ANBAAN VİDEO

Şamaxı-İsmayıllı yolunda avtomobil yanıb.

Avtosfer.az oxu.az-a istinadən xəbər verir ki, bununla bağlı videogörüntü sosial şəbəkədə yayımlanıb.

Qeyd edilib ki, "Audi Q7" markalı, 99-UL-525 dövlət nömrə nişanlı avtomobil yanıb.

Fövqəladə Hallar Nazirliyinin (FHN) Mətbuat Xidmətindən bildirilib ki, qurumun "112" qaynar telefon xəttinə Şamaxı rayonu, Muğanlı kəndi ərazisində avtomobildə yanğın baş verməsi barədə məlumat daxil olub.

Məlumatla əlaqədar dərhal FHN-in Dövlət Yanğından Mühafizə Xidmətinin Şamaxı Rayon Yanğından Mühafizə Hissəsinin qüvvələri əraziyə cəlb olunublar. Hadisə yerində əməliyyat şəraiti qiymətləndirilərkən "Audi Q7" markalı minik avtomobilində yanğın baş verdiyi məlum olub. Yanğınsöndürənlər tərəfindən yanğın qısa müddətdə söndürülüb. Yanğın nəticəsində avtomobilin yanar hissələri və ətrafında 200 kvadratmetr sahədə quru ot yanıb. Ətraf ərazilər yanğından mühafizə olunub. Xəsarət alan olmayıb.