Astronomlar ən uzaq qalaktikada oksigen aşkarlayıblar

Astronomlar kainatın ən uzaq qalaktikası olan JADES-GS-z14-0-da oksigen aşkar ediblər. Bu mühüm kəşf erkən kainatda qalaktikaların formalaşmasının gözləniləndən daha sürətli baş verdiyini göstərir. Avtosfer.az "Azərtac"a istinadla xəbər verir ki, JADES-GS-z14-0 qalaktikası keçən il Ceyms Uebb Kosmik Teleskopu (JWST) tərəfindən kəşf edilib. Qalaktika o qədər uzaqdır ki, onun işığı bizə 13,4 milyard ilə çatır, yəni biz onu kainatın yaşı cəmi 300 milyon il olduğu dövrdə görürük.

Tədqiqatçılar JADES-GS-z14-0-da gözləniləndən təxminən 10 dəfə çox ağır elementlər olduğunu müəyyənləşdiriblər. Bu, qalaktikaların ilkin təkamül mərhələlərinə dair yeni suallar yaradır.

İlk qalaktikalar və onların ulduzları böyük partlayışdan qısa müddət sonra formalaşıb və sürətlə inkişaf edib. Bu nəticələr erkən kainatdakı ulduz və qalaktika əmələgəlmə modellərinin yenidən nəzərdən keçirilməsini tələb edir.