15 azərbaycanlının olduğu gəmiyə hücum diplomatik gərginlik yaratdı

Ukraynanın Ankaradakı səfiri Nəriman Cəlalov Qara dənizdə vurulan Türkiyə gəmisinə və onu çəkmək üçün göndərilən digər qoşqu gəmisinə hücumla bağlı Xarici İşlər Nazirliyinə (XİN) çağırılıb.

Avtosfer.az xəbər verir ki, bu barədə "TRT Haber" XİN-dəki mənbələrinə istinadən məlumat yayıb.

"Avqustun 26-da Qara dənizdə - Tuapse sahillərində Türkiyə tərəfindən idarə olunan "Lider Bordo Mavi" gəmisinin vurulması və onu çəkmək üçün növbəti gün hadisə yerinə yollanan "Lider Kocatepe" gəmisinin də hədəfə alınmasından sonra Ukraynanın Ankaradakı səfiri nazirliyə çağırılıb", - deyə xəbərdə bildirilir.

Qeyd olunur ki, keçirilən görüş zamanı Türkiyənin bu hücumlarla bağlı reaksiyası qarşı tərəfə çatdırılıb.

"Eyni zamanda, Qara dənizdə insanların həyatının, əmlakın, naviqasiyanın və ətraf mühitin təhlükəsizliyinin təmin olunmasının mütləq zərurət olduğu vurğulanaraq, lazımi xəbərdarlıqlar edilib", - deyə "TRT Haber"i məlumatlandıran mənbə bildirib.

Qeyd edək ki, gəminin göyərtəsində 15 azərbaycanlı və dörd türkiyəli dənizçi olub. Hücum nəticəsində xəsarət alanların olmadığı bildirilir.