ABŞ-də fövqəladə vəziyyət ELAN EDİLDİ

ABŞ Prezidenti Donald Tramp enerji sisteminə təhdidlər səbəbindən fövqəladə vəziyyət elan etmək və enerji sistemində bir sıra xarici texniki vasitələrdən istifadəyə məhdudiyyətlər qoymaq barədə qərar qəbul edib.

Avtosfer.az xəbər verir ki, müvafiq sərəncam Ağ Evin saytında dərc olunub.

“Elektrik enerjisi sistemləri üçün avadanlıqların xaricdən tədarükü ilə bağlı vəziyyətin ABŞ-nin milli təhlükəsizliyi, xarici siyasəti və iqtisadiyyatı üçün qeyri-adi və fövqəladə təhlükə yaratdığını hesab edirəm. Bu təhlükə tamamilə və ya əhəmiyyətli dərəcədə ABŞ hüdudlarından kənardan qaynaqlanır və bununla əlaqədar ölkədə fövqəladə vəziyyət elan edirəm. Bu təhlükə həm ayrı-ayrılıqda, həm də ümumilikdə sövdələşmələrdə mövcuddur. Bu təhlükənin qarşısını almaq üçün ABŞ-də istifadə olunan elektrik enerjisi sistemləri üçün avadanlıqların təhlükəsizliyini, bütövlüyünü və etibarlılığını qorumaq məqsədilə əlavə tədbirlər görülməsi zəruridir”, - Amerika liderinin sərəncamında deyilir.

Donald Trampın qərarına əsasən, xaricdə istehsal olunan bir sıra elektrik avadanlıqlarının, kritik əhəmiyyətli proqram təminatının, eləcə də ABŞ elektrik şəbəkəsindəki zəifliklərdən kiberhücumlar üçün istifadə oluna biləcək rəqəmsal komponentlərin satın alınması və quraşdırılması qadağan edilir.

Belə avadanlıqlar sırasına yüksək gərginlikli transformatorlar, günəş və akkumulyator sistemləri üçün invertorlar, generatorlar, rele mühafizəsi qurğuları və ağıllı elektron cihazlar daxildir.