ANAMA-dan işğaldan azad edilmiş ərazilərlə bağlı XƏBƏRDARLIQ

İşğaldan azad edilmiş ərazilərdə müvafiq icazə və səlahiyyət olmadan təhlükəli ərazilərdə qanunsuz işlərin görülməsi bədbəxt hadisələrə səbəb olur.

Avtosfer.az xəbər verir ki, bu barədə ANAMA məlumat yayıb.

Bildirilib ki, bəzi şəxslər təhlükəli ərazilərdə texnikadan istifadə etməklə torpaqların kənd təsərrüfatı məqsədilə hazırlanması, tikinti, yol və keçidlərin bərpası kimi işlər həyata keçirirlər.

Məlumata görə, son belə hadisələrdən biri Laçın rayonunun təmas xəttinə yaxın Fingə kəndi ərazisində baş verib. “Falcon” şirkətinin əməkdaşı, 1992-ci il təvəllüdlü Ülfət Quliyevin idarə etdiyi traktor minalardan təmizlənməmiş ərazidə minaya düşüb. Hadisə zamanı insan tələfatı qeydə alınmayıb.

ANAMA bildirib ki, bu cür qanunsuz fəaliyyətlər ərazilərin təhlükəsizliyi barədə yanlış təsəvvür yaradır və daha ağır nəticələrə səbəb ola bilər.

Qurum vətəndaşları minalardan təmizlənməmiş ərazilərdə özbaşına qazıntı, şumlama və təmizləmə işləri aparmamağa, belə ərazilərə müdaxilə etməməyə çağırıb.

Həmçinin vətəndaşlardan bu kimi hallarla qarşılaşdıqda 805, 102 və 112 qaynar xətlərinə məlumat vermələri xahiş olunub.