Azərbaycan və Yunanıstan rəqəmsal əməkdaşlığı müzakirə edib - FOTO

Rəqəmsal inkişaf və nəqliyyat nazirinin müavini Saməddin Əsədov Yunanıstanın daxili işlər nazirinin müavini Paraskevi Xaralamboyanni ilə görüşüb.

Avtosfer.az xəbər verir ki, bu barədə Rəqəmsal İnkişaf və Nəqliyyat Nazirliyi məlumat yayıb.

Bildirilib ki, görüşdə rəqəmsal inkişaf sahəsində iki ölkə arasında əməkdaşlıq imkanları müzakirə olunub.

Saməddin Əsədov Azərbaycanda rəqəmsallaşma və innovasiya ekosisteminin inkişafı istiqamətində görülən işlər barədə məlumat verib.

O, “mygov”, “Digital Bridge”, “Digital Login” və “SİMA” kimi rəqəmsal təşəbbüslərin dövlət xidmətlərinin elektron inteqrasiyasına, məlumat mübadiləsinin sürətləndirilməsinə və vətəndaşların xidmətlərdən rahat istifadəsinə imkan yaratdığını bildirib.

Görüşdə həmçinin rəqəmsal transformasiya, dövlət idarəçiliyinin müasirləşdirilməsi və bu sahələrdə ikitərəfli əməkdaşlığın genişləndirilməsi perspektivləri ətrafında fikir mübadiləsi aparılıb.