Azərbaycanda iqlim fondu yaradıldı - Hikmət Hacıyevdən AÇIQLAMA

Azərbaycan digər neft və qaz hasil edən dövlətlərin və şirkətlərin sərmayə qoymasını gözlədiyi iqlim fondu yaradıb. 

Avtosfer.az xəbər verir ki, bunu Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev "Financial Times"a açıqlamasında deyib. 

"Bu ilki COP29-da fosil yanacaqlardan qlobal keçidi reallığa çevirmək üçün maliyyə hədəfinin - Yeni Kollektiv Kəmiyyətli Məqsədin artırılmasına diqqət yetiriləcək. Bundan əlavə, Azərbaycan digər neft və qaz hasil edən dövlətlərin və şirkətlərin sərmayə qoymasını gözlədiyi iqlim fondu yaradıb. 

Azərbaycan neft və qaz istehsalçısının necə keçid edə biləcəyini nümayiş etdirir. Biz təkcə regionun ən böyük bərpa olunan layihələrini həyata keçirmirik, həm də qalıq yanacaqdan elektrik enerjisi ixracına keçirik. Azərbaycan Aİ ilə tərəfdaşlıqda Xəzər dənizinin külək enerjisini qitə ilə əlaqələndirmək üçün Qara dənizin dibində elektrik kabelini inkişaf etdirir. Xarici enerji bazarlarını hərəkətə gətirən tələbata təsir edə bilməsək də, təklif tərəfini yenidən formalaşdırırıq.

Azərbaycan COP-a ev sahibliyi edir, çünki biz sülh yolu ilə gedirik. COP-da biz qalıq yanacaqlardan bərpa olunan mənbələrə ədalətli keçidi maliyyələşdirmək üçün yeni fondların tərəfdarı olacağıq, bu dəyişikliyi artıq fəal surətdə davam etdiririk", - deyə diplomat qeyd edib.