"AzərEnerji” ilin birinci rübünün nəticələrini açıqladı

Cari ilin üç ayı ərzində “AzərEnerji” ASC-nin balansında olan istilik və su elektrik stansiyalarında 6 milyard 295 milyon kVts elektrik enerjisi istehsal olunub. 

Avtosfer.az xəbər verir ki, istehsal edilən enerjinin həcmi ötən ilin ilk üç ayında istehsal edilən enerjinin həcmi ilə demək olar eyni olsa da, səmərəlilik baxımından irəliləyişlər əldə edilib. 

Bu isə istilik enerjisinin azaldılması və əvəzində ekoloji cəhətdən təmiz və sərfəli su enerjisinin artması ilə bağlıdır. 

Belə ki, ötən ilin üç ayı ərzində su elektrik stansiyalarında 420 milyon kVts enerji istehsal edildiyi halda, 2025-ci ilin ilk üç ayında 645 milyon kVts istehsal olunub. Bununla da 1,5 dəfə istilik enerjisi azaldılaraq su elektrik enerjisi ilə əvəzlənib. Sözsüz ki, su elektrik stansiyalarınının payına düşən  istehsalın artması Qarabağ və Şərqi Zəngəzurda ardıcıllıqla tikilərək istismara verilən kiçik su elektrik stansiyaları ilə bağlıdır. 

Bundan əlavə ötən ilin müvafiq dövrü ilə müqayisədə “AzərEnerji” tərəfindən 1 kVts elektrik enerjisi istehsalı üçün şərti yanacağın xüsusi sərfiyyatı 6,2 qram azaldılıb və bununla da 78,5 milyon kub metr təbii qaza, o cümlədən maliyyə vəsaitinə qənaət edilib.