BƏƏ Hörmüz boğazından yan keçmək üçün yeni liman və terminal tikəcək

Birləşmiş Ərəb Əmirliklərinin (BƏƏ) dövlət şirkəti "DP World" BƏƏ-nin şərqində Hörmüz boğazından yan keçməklə neft və digər malların daşınması üçün yeni çoxfunksiyalı liman və konteyner terminalı inşa edəcək.

Avtosfer.az-ın "Report"a istinadən xəbərinə görə, bu barədə "The Financial Times" (FT) şirkət nümayəndəsinə istinadən məlumat yayıb.

Qeyd olunur ki, Fuceyra sahil zonasındakı yeni infrastruktur əmirliyin flaqman mərkəzi olan Cəbəl-Əlidən asılılığını azaldacaq. ABŞ-İran münaqişəsinin kəskinləşməsindən sonra regionun ən böyük konteyner limanı olan Cəbəl-Əlidə fəallıq 90-95 % azalıb. Bu, "DP World"ü beynəlxalq tərəfdaşlarını təchiz etmək üçün alternativlər axtarmağa sövq edib.

"Bizim öz planımız var və "DP World"nin nöqtey-nəzərindən şərq sahilindəki imkanları fəal araşdırırıq. Bu, nəyinsə düz getməyəcəyi təqdirdə, bir növ sığorta tədbiridir", - şirkət bildirib.

Yeni layihə "DP World"ün Oman körfəzindəki mövcudluğunu genişləndirəcək və konteynerlərin Hörmüz boğazından keçmədən ölkəyə daxil olub-çıxmasına imkan verəcək, bundan sonra onlar yük maşını ilə quru yolu ilə Dubay, Əbu-Dabi və qonşu Körfəz ölkələrinə daşınacaq.

Şirkət nümayəndəsi layihənin hələ yekunlaşdırılmadığını və BƏƏ hakimiyyəti ilə danışıqların davam etdiyini açıqlayıb. Lakin, yekun təsdiq alınsa, onun həyata keçirilməsi ilyarımdan çox çəkməyəcək.