Deputat: "Mikromobilliyin inkişafı nəqliyyat infrastrukturu üçün yeni yanaşmadır"

"Azərbaycanda mikromobillik vasitələrindən və modelindən istifadə edilməsi nəzərdə tutulur. Çünki məqsəd bu modelə transformasiyanı həyata keçirməkdən ibarətdir".

Bu sözləri Milli Məclisin deputatı Vüqar Bayramov deyib.

Onun sözlərinə görə, bununla bağlı qanunvericiliyə dəyişiklik edilib:

"Elektrik mühərriki kiçik nəqliyyat vasitələrinin, velosipedlərin, o cümlədən, digər yol istifadəçilərinin təhlükəsizliyinin təmin edilməsi ilə bağlı qanunverici baza formalaşdırılıb. Burada məqsəd nəqliyyat infrastrukturunun beynəlxalq standartlara uyğunlaşdırılması, eyni zamanda, mikromobil vasitələrdən istifadə olunması və onlardan istifadə edən vətəndaşlarımız üçün daha geniş imkanların yaradılmasından ibarətdir. Bu, həm fərdi, həm də ictimai nəqliyyatda diversifikasiyanın, yəni daha çox şaxələnmənin tətbiq edilməsinə, digər tərəfdən, təhlükəsiz şəkildə mikromobil vasitələrdən istifadə edən vətəndaşlarımızın hərəkətinin tənzimlənməsinə imkan yaradır".

"Ona görə də sözsüz ki, beynəlxalq praktika və xüsusən də inkişaf etmiş ölkələrin təcrübəsinə diqqət yetirsək, mikromobilliyin inkişaf etməsi, bütövlükdə nəqliyyat infrastrukturu üçün Azərbaycanda yeni bir yanaşmadır. Amma sözsüz bu yanaşma birmənalı şəkildə beynəlxalq standartlar çərçivəsində həyata keçirilən islahatdır", - deyə deputat əlavə edib.