Əlcəzairin hərbi təyyarəsi Ermənistandan keçməklə Azərbaycana uçdu

Əlcəzair Hərbi Hava Qüvvələrinə məxsus “Lockheed Martin C-130J-30 Super Hercules” tipli təyyarə Ermənistanın hava məkanından istifadə etməklə Azərbaycana uçub.

Avtosfer.az “Sputnik Ermənistan”a istinadən xəbər verir ki, bu barədə Ermənistan Xarici İşlər Nazirliyinin (XİN) məlumatında deyilir. Qeyd edilib ki, uçuş diplomatik məqsədlərlə həyata keçirilib. 

“Uçuşu həyata keçirən tərəfin təqdim etdiyi məlumata əsasən, C-130J təyyarəsinin həyata keçirdiyi Bufarik-Bakı reysi diplomatik məqsədlərlə baş tutub”, - nazirlik açıqlayıb. 

Qeyd edək ki, sözügedən təyyarə fevral ayında Ankaradan Bakıya, Bakıdan isə Əlcəzairin Bufarik şəhərinə uçmaq üçün Ermənistanın hava məkanından istifadə edib.