Erməni bacılar "Formula-1" üçün Bakıya gəlibmişlər - VİDEO

Sankt-Peterburqda yaşayan erməniəsilli qadın "Formula-1" Azərbaycan Qran-prisini izləmək məqsədilə bacısı ilə birlikdə Bakıya səfər edib.

Avtosfer.az xəbər verir ki, o, öz sosial şəbəkə hesabında "Mən necə erməni soyadı ilə Azərbaycana "Formula-1" yarışına getdim" adlı xüsusi paylaşım edərək təəssüratlarını izləyicilərinə çatdırıb.

"Vurğulamaq istərdim ki, bu səfərə əvvəlcədən hazırlıq görmüşdüm. Müvafiq dövlət orqanlarına müraciət etdikdən sonra mənə "gələ bilərsiniz, heç bir problem yaranmayacaq" cavabı verildi", - deyə Olqa Tamazyan paylaşımında qeyd edib.

O, həmçinin əlavə edib ki, sərhəddə bacısı və ona valideynləri, mənşələri, eləcə də Qarabağla hər hansı bağlılıqlarının olub-olmaması ilə bağlı sualların veriləcəyi bildirilib. Turistin sözlərinə əsasən, onların belə bir əlaqəsi heç vaxt mövcud olmayıb.

Bundan başqa, bacılar əvvəlki xarici səfərləri haqqında heç bir qeyd olmayan yeni pasportlar alıblar. Olqanın bildirdiyinə görə, sərhəd-buraxılış məntəqəsindəki yoxlama proseduru düşündüklərindən qat-qat rahat baş tutub. "Hava limanına düşəndə sərhədçilərin bizi saxlayaraq rəhbərliklərindən kimisə çağırmaları məni olduqca təəccübləndirdi. Lakin həmin şəxs yalnız harada gecələyəcəyimizlə maraqlandı və proses bununla yekunlaşdı. Bütün yoxlama cəmi beş dəqiqə vaxtımızı aldı", - deyə Tamazyan vurğulayıb.

"Cəmiyyətdə nifrət toxumu səpən belə bir kəskin rəyin nə səbəbə formalaşdırıldığını indiyə qədər anlaya bilmirəm. Biz Azərbaycana gələrək düz beş gün qaldıq. Mehmanxanada, taksidə və müxtəlif məkanlarda hər kəs erməni soyadımızı aydın şəkildə görürdü. Buna rəğmən, tək bir insan belə bizə qarşı hər hansı nalayiq ifadə işlətmədi", - deyə o, paytaxtda olduqları müddətdə soyadlarına görə zərrə qədər də mənfi rəftarla üzləşmədiklərini diqqətə çatdırıb.