Ermənistanın 100-dən çox yük maşını Rusiyaya buraxılmır

Ermənistanın ən böyük nəqliyyat-ekspeditor şirkətlərindən biri olan “Spayka”ya məxsus 100-dən çox yük maşını artıq bir neçə gündür Rusiyaya daxil ola bilmir. Rusiya hüquq-mühafizə orqanları yük avtomobillərini səbəb izah etmədən saxlayır. Ermənistan hakimiyyəti isə bu barədə heç bir rəsmi bildiriş və ya irad almadığını açıqlayıb.

Avtosfer.az xəbər verir ki, bu barədə “Hraparak” qəzeti məlumat yayıb.

Məlumata görə, Moskvanın bu addımlarının siyasi məna daşıya biləcəyi istisna edilmir. Son vaxtlar “Spayka” şirkətinin direktoru ABŞ-ın Ermənistandakı səfiri ilə mütəmadi görüşlər keçirib və bu görüşlər yerli mediada geniş işıqlandırılıb. Qəzetin yazdığına görə, təxminən iki həftə əvvəl keçirilən son görüş Rusiyanın narazılığına səbəb olub.