İcra Hakimiyyəti bu ada “yox” demişdi, məhkəmə icazə verdi

Naxçıvanda valideynlər oğullarına “Eray” adını vermək istəyiblər, lakin İcra Hakimiyyətinin Qəyyumluq və Himayə Komissiyası bu müraciəti rədd edib.

Avtosfer.az Modern.az-a istinadən xəbər verir ki, uşaq 2020-ci ildə doğulub və sənədlərdə adı Elmirdir. 

Valideynlərin sözlərinə görə, oğulları doğulduğu gündən evdə hamı ona “Eray” deyə müraciət edir və uşaq da bu ada adət edib.

İcra Hakimiyyəti isə adın dəyişdirilməsi üçün əsas olmadığını bildirib və Elmir adının uşağın mənafeyinə zidd olmadığını əsas gətirib. Qeyd edilib ki, Eray adı Elmir adı ilə müqayisədə əhəmiyyətli fərqlilik təşkil etmir. 

Valideynlər bu qərardan məhkəməyə şikayət veriblər. Məhkəmə isə onların arqumentlərini əsaslı sayıb və qeyd edib ki, uşağın adı onun fərdiyyətini və sosiallaşmasını ifadə edir, valideynlərin birgə razılığı olduqda adın dəyişdirilməsi mümkündür. 

Azərbaycan Milli Elmlər Akademiyası (AMEA) tərəfindən məhkəmənin sorğusuna cavab olaraq bildirib ki, Eray şəxs adı dilimizdəki “ər” kökündən yaranıb. Həmin kökün “er” variantı dilimizdə mövcud olmadığı üçün bu adın onomastik adlar sistemində Azərbaycan ədəbi dilinin normalarına uyğun yazılış forması “Əray” şəklindədir.

Ədliyyə Naziriliyi isə son beş ildə ölkədə 48 uşağa “Eray” adı verildiyini bildirib. Dil normaları baxımından da bu adın istifadəsində problem yoxdur. 

Nəticədə məhkəmə Komissiyanın imtina qərarını ləğv edib və uşağın adının Elmirdən Eraya dəyişdirilməsinə icazə verilməsi barədə qərar çıxarıb.