İran və Ermənistan dəmir yolu əməkdaşlığını genişləndirir

İran və Ermənistan arasında dəmir yolu əməkdaşlığı genişləndirilir.

Avtosfer.az xəbər verir ki, bu barədə "Azad İran" "Telegram" kanalı məlumat verib.

İran Dəmir Yollarının rəhbəri Cabbar Əli Zakeri Sərdrudi erməni həmkarı ilə görüşüb. Görüşdə MDB məkanında dəmir yolu nəqliyyatı sahəsində əməkdaşlığın genişləndirilməsi və İranın İrəvan üzərindən Rusiyaya çıxış marşrutunun açılması müzakirə olunub.

Məlumata görə, tərəflər dayanıqlı dəmir yolu daşımalarının təşkili, marşrut üzrə daşına biləcək yüklərin müəyyən edilməsi və ekspeditor şirkətlərin fəaliyyətinin işə salınması məsələlərinə toxunublar.

Danışıqlarda Azərbaycan və Ermənistan arasında əldə olunmuş son razılaşma kontekstində, Şimal-Cənub dəhlizinin Naxçıvan marşrutu üzərindən açılmasının mümkünlüyü qeyd olunub. Bu addımın İran-Rusiya dəmir yolu əlaqələrinin qurulmasına şərait yarada biləcəyi vurğulanıb. Tərəflər növbəti görüşün yaxın vaxtlarda Tehranda keçirilməsi barədə razılığa gəliblər.