Kəlbəcərdə işıq dirəyini tarixi abidənin “qulağına tikiblər”

Kəlbəcər rayonunda işıq dirəyinin qədim körpünün düz böyrünə basdırılması narazılığa səbəb olub.

Avtosfer.az xəbər verir ki, əslən Kəlbəcər rayonundan olan əməkdar jurnalist, naşir, sabiq deputat Əlövsət Ağalarov bu məsələyə sosial şəbəkədə belə reaksiya verib:

“Ən böyük əraziyə sahib rayonda işıq dirəyini basdırmağa yer tapmadılarmı? Dirəyi gətirib 150 ildən çox yaşı olan tarixi abidənin “qulağına tikiblər”…”.

Digər sosial media hesablarında da Kəlbəcər Xüsusi Nümayəndəliyinə və Kəlbəcər rayonunda Bərpa, Tikinti və İdarəetmə Xidmətinə bununla bağlı çağırışlar edilib. Qeyd olunub ki, sözügedən Nümayəndəlik və Xidmət bu işlərə ciddi nəzarət etməlidir, əks halda tarixi abidə sayılan və XIX əsrdə qurulan körpü hansısa mühəndislərin səhvi, etinasızlığı ucbatından tarixin uçurumuna yuvarlana bilər.

O da qeyd olunub ki, bu kimi işlərdə rayonu yaxşı tanıyan insanlarla məsləhətləşmək gərəkdir.

Əlövsət Ağalarov açıqlamasında deyib ki, sözügedən körpünü 1870-ci ildə Hacı Əhməd salıb:

“Körpü Tərtər çayının üstündə yerləşir və yol Soyuqbulaq kəndinə aparır. Ona görə də bu körpüyə Soyuqbulaq körpüsü deyirlər”. /Medianews.az/