"Meyvəli" bazarı yaxınlığındakı problemlə bağlı qurumdan RƏSMİ AÇIQLAMA - VİDEO

Lökbatan-Xocasən yolunu ("Meyvəli" ticarət mərkəzinin yaxınlığı) genişləndirmək üçün dəmir arakəsmələrin ləğv edilməsindən sonra vətəndaşlar problemlə qarşılaşıblar. Onlar iddia edirlər ki, torpağa bərkidilən dəmir sütunların üzəri asfaltla qapadılmayıb. Bu səbəbdən avtomobillərin təkərləri zədələnir.

Məsələ ilə bağlı Azərbaycan Avtomobil Yolları Dövlət Agentliyi (AAYDA) ilə əlaqə saxladıq.

Avtosfer.az xəbər verir ki, qurumun mətbuat katibi Anar Nəcəfli Oxu.Az-ın sorğusuna cavab olaraq bildirib ki, AAYDA-nın əməkdaşları əraziyə cəlb olunacaqlar.

"Hər bir halda, şikayət varsa, aidiyyəti üzrə məlumat veriləcək və əməkdaşlarımız əraziyə baxış keçirəcəklər. Nəqliyyatın hərəkətinin təhlükəsizliyi ilə bağlı hər hansısa problem ortaya çıxarsa, onun aradan qaldırılması istiqamətində qısa müddətdə işlər həyata keçiriləcək", - deyə Anar Nəcəfli qeyd edib.

Məsələni diqqətdə saxlayacağıq.