Moskva 2027-ci il üçün planını açıqladı: Miqrantlarla bağlı yeni limitlər

Rusiyanın paytaxtı Moskvada 2027-ci il üçün müxtəlif məşğulluq sahələrində miqrantların icazə verilən payı müəyyənləşdirilib.

Avtosfer.az Oxu.az-a istinadən xəbər verir ki, bu barədə şəhər meriyasının rəsmi saytında yerləşdirilən sənəddə qeyd olunub.

Bildirilib ki, Moskva komissiyasının qərarı ilkin xarakter daşıyır və gələcəkdə dəyişdirilə bilər. Bununla yanaşı, federal səviyyədə iş yerlərində miqrantların payının azaldılması tendensiyası davam edir. Moskvada isə bəzi sahələr üzrə 2026-cı ildən etibarən müəyyən yumşalmalar tətbiq olunub.

Belə ki, tikinti, apteklər, qeyri-stasionar ticarət obyektləri, bazarlarda pərakəndə satış, eləcə də mağazalardan kənar fəaliyyət sahələrində miqrantların çalışmasına məhdudiyyət qoyulmayıb.

Tərəvəzçilik və meşə təsərrüfatında maksimal pay 50 faiz, alkoqol və tütün ticarətində 15 faiz, sərnişin və yük avtomobil daşımalarında 24 faiz, daşınmaz əmlakın idarə olunması və binalara xidmət sahəsində isə 70 faiz müəyyən edilib.

Qeyd edək ki, mart ayında Rusiyada miqrantların ala biləcəyi ən yüksək maaşın Moskva şəhərində idarə heyətinin sədri vəzifəsi üzrə 380 min rubl (8 320 manat) olduğu açıqlanmışdı.