Moskvanın hava limanlarından birinin rəhbərliyi iflas olduqlarını etiraf etdi

Rusiya paytaxtı Moskvanın Domodedovo hava limanının ümumi borcu təxminən 70 milyard rubl (2 milyard manata yaxın) təşkil edir.

Avtosfer.az-ın xəbərinə görə, bu barədə RBK-ya müsahibəsində hava limanının dövlət mülkiyyətinə keçməsindən sonra ona rəhbərlik etmiş Andrey İvanov məlumat verib.

O bildirib ki, 2025-ci ildə faiz ödənişləri səkkiz milyard rubl (173 milyon manata yaxın) təşkil edəcək.

Andrey İvanovun sözlərinə görə, sırf hava limanının iqtisadiyyatından söhbət gedərsə, indi onu müflis (iflasa uğramış) adlandırmaq olar.

"Lakin biz iflas riskinə yol verməyəcəyik. Strateji investorun və ya investorların vaxtında cəlb edilməsinə ümid edirik", - deyə o qeyd edib.

İvanov əlavə edib ki, borc sərnişin axınının və gəlirlərin azalması səbəbindən yaranıb. Bu faktora baxmayaraq, daha bir T2 sərnişin terminalı açılıb ki, bu da əlavə xərclər tələb edib. Hava limanı, həmçinin kredit götürməyə də davam edib.