Ötən il erkən nikahla bağlı 28 nəfər məsuliyyətə cəlb olunub

Ötən il həyata keçirilən qabaqlayıcı tədbirlər nəticəsində 90 erkən nikah cəhdinin qarşısı alınıb. Bu barədə Daxili İşlər Nazirliyində 2025-ci ilin yekunlarına və cari il üçün qarşıda duran vəzifələrə həsr olunmuş kollegiya iclasında daxili işlər naziri, general-polkovnik Vilayət Eyvazov məlumat verib.

Avtosfer.az-ın xəbərinə görə, nazir bildirib ki, müəyyən edilmiş faktlar üzrə 28 nəfər cinayət məsuliyyətinə cəlb olunub. Bundan başqa, beş valideyn və 41 aidiyyəti şəxs barəsində inzibati tənbeh tədbirləri görülüb, 57 şəxslə isə profilaktik söhbətlər aparılıb.

Eyni zamanda, 15 qız qaçırma faktı ilə bağlı Cinayət Məcəlləsinin adam oğurluğu maddəsi əsasında cinayət işləri başlanılıb və 32 nəfər haqqında müvafiq hüquqi tədbirlər görülüb.