Paşinyan bu tarixdə Bakıya gələcək - Deputat AÇIQLADI

Ermənistanın Baş naziri Nikol Paşinyan dəvət olunacağı təqdirdə, 2028-ci ildə Avropa Siyasi Birliyinin sammitində iştirak etmək üçün Azərbaycana gələcəyini açıqlayıb.

Milli Məclisin deputatı Hikmət Babaoğlu açıqlamasında qeyd etdi ki, siyasət çox dinamik və şərtləri tez dəyişən bir prosesdir:

"Ona görə də analitiklər daim qısamüddətli, ortamüddətli və uzunmüddətli proqnozlar hazırlayaraq həm siyasi proseslərin özünə yön verməyə çalışırlar, həm də qəbul edilə biləcək qərarların necə olacağını proqnozlaşdırmağa cəhd göstərirlər. 2028-ci ildə Paşinyanın Avropa Siyasi Birliyinin Azərbaycanda keçiriləcək sammitində iştirak etmək arzusu, mənim fikrimcə, reallaşa bilər. Ermənistan və Azərbaycan arasında diplomatik əlaqələrin yaradılması üçün indiyədək heç vaxt bu qədər əlverişli şərtlər olmayıb. Bununla yanaşı, həmin şərtlərin bir qisminin hələ də tam formalaşmadığını da görürük. Ona görə də bu istiqamətdə vacib addımların atılması zəruridir.

Qarşıda təxminən iki illik müddət var. Bu dövr ərzində Ermənistan rasional qərarlar qəbul edərək Azərbaycanın tələblərinə uyğun addımlar atsa və nəticədə qısamüddətli perspektivdə iki ölkə arasında diplomatik əlaqələr yaransa, heç şübhəsiz, Paşinyanın 2028-ci ildə Bakıya gəlməsi mümkün ola bilər".

Millət vəkili Nikol Paşinyanın istəyi ilə bağlı öz proqnozunu da bildirdi:

"Mənim proqnozuma gəldikdə isə bu ehtimalın kifayət qədər yüksək olduğunu düşünürəm. Bunun reallaşması üçün zəruri addımların atılması vacibdir. Əgər hər hansı fövqəladə və ya gözlənilməz hadisələr baş verməzsə, çox güman ki, Paşinyanın 2028-ci ildə Azərbaycana gəlmək ehtimalı xeyli yüksək olacaq".