Paytaxtın Yasamal rayonunda piyadaların təhlükəsizliyi artırıldı

Daxili İşlər Nazirliyinin Nəqliyyatı İntellektual İdarəetmə Mərkəzinin məlumatına görə, Yasamal rayonu ərazisində – Həsən bəy Zərdabi küçəsi ilə Heydər Hüseynov küçəsinin kəsişməsində layihə əsasında yeni piyada bölməli nəqliyyat svetoforları quraşdırılıb.

Avtosfer.az xəbər verir ki, görülən işlər Milli Onkologiya Mərkəzi və Respublika Klinik Xəstəxanasına gedən piyadaların yoldan daha təhlükəsiz keçməsini təmin etmək məqsədi daşıyır. Yeni svetofor sisteminin tətbiqi nəticəsində nəqliyyat vasitələrinin hərəkətində növbəlilik düzgün tənzimlənib, eyni zamanda piyadalar üçün təhlükəsiz keçid şəraiti yaradılıb.

Qeyd edək ki, bu cür layihələrin icrası paytaxtda yol hərəkəti təhlükəsizliyinin yüksəldilməsinə və piyadaların rahatlığının təmin olunmasına xidmət edir.