Prezident helikopteri ilə bağlı insident ABŞ-ni hərəkətə keçirdi: Aviasiya sistemində böyük islahat

Vaşinqton səmasında sərnişin təyyarəsi ilə prezidentə məxsus "Marine One" helikopteri arasında baş verən təhlükəli yaxınlaşma insidentindən sonra ABŞ-nin Federal Mülki Aviasiya İdarəsi (FAA) hava hərəkətinin idarə olunması sistemlərində genişmiqyaslı islahatlara başlayıb.

Avtosfer.az-ın "Wall Street Journal" nəşrinə istinadən verdiyi məlumata görə, gələcəkdə bu cür halların qarşısını almaq məqsədilə qurum hava hərəkətini idarə edən antenaların yerlərinin dəyişdirilməsi və mövcud uçuş reqlamentlərinin yenilənməsi də daxil olmaqla kompleks tədbirlər planlaşdırır.

Dispetçer xidmətləri ilə pilotlar arasındakı rabitədə yarana biləcək maneə risklərini minimuma endirmək üçün radiosiqnalların gücləndirilməsinə xüsusi diqqət yetiriləcək.

Nəşrin tanış olduğu FAA-nın daxili yoxlamasının nəticələrinə əsasən, hadisə zamanı koordinasiya səhvinə yol verilib: dispetçer "Marine One" heyətinə "American Airlines"a məxsus sərnişin təyyarəsinin yaxınlıqda olması barədə məlumat versə də, kommersiya reysinin pilotlarını prezident helikopterinin yaxınlaşması ilə bağlı xəbərdar etməyib.

Bununla əlaqədar olaraq, aviadispetçerlər üçün əlavə təlimlərin keçirilməsi nəzərdə tutulur.

FAA rəhbərliyi artıq Ağ Evin helikopter bölməsi ilə danışıqlar aparıb. Texniki yenilənmələrlə yanaşı, "Marine One" heyətinin dispetçerlərlə fasiləsiz qarşılıqlı əlaqəsini təmin etmək üçün ehtiyat rabitə kanallarının tətbiqi də nəzərdən keçirilir.