Qazaxıstan Poti limanında yeni terminal istifadəyə verib

Qazaxıstanın logistika operatoru “PTC Holding” bu ilin aprelində Gürcüstanın Poti dəniz limanında yeni ligistika terminalını istifadəyə verildiyini elan edib. Bildirilir ki, yeni logistika terminalı Orta Dəhlizin (Transxəzər Beynəlxalq Nəqliyyat Marşrutu) mühüm infrastruktur hissəsinə çevriləcək.

Avtosfer.az “Azərtac”a istinadla xəbər verir ki, terminal 9 hektar ərazini tutur, onun ötürmə qabiliyyəti 20 fut ekvivalentində, ildə 80 min konteynerdən çox olacaq.

Yeni qurğu, həmçinin Rusiyadan yükdaşıma xidmətlərinin genişləndirilməsi strategiyasını həyata keçirməyə imkan verəcək.

Bildirilir ki, Potidəki yeni terminal sadəcə növbəti infrastruktur nöqtəsi deyil, şirkətin qlobal strategiyasının həyata keçirilməsində mühüm mərhələdir. Yeni logistika obyekti rəsmi olaraq Transxəzər Beynəlxalq Nəqliyyat Marşrutuna assosiativ üzv kimi qoşulub və onun işə salınması Asiya ilə Avropanı birləşdirən bütün marşrutun mühüm tərkib hissəsinə çevriləcək.

Terminalın özəlliyi ondan ibarətdir ki, buradakı bütün kommunal xidmətlər (su təchizatı, kanalizasiya, elektrik təchizatı, yanğınsöndürmə sistemi və s.) platformanın altında yerləşib ki, bu da yüklərin zədələnməsi, istənilən qeyri-standart, fövqəladə hallar riskini azaltmağa imkan verir.