Rusiya İranın “Rəşt-Astara” dəmir yolunun tikintisinə tez başlayacağına ümid edir

Rusiya “Şimal-Cənub” beynəlxalq nəqliyyat dəhlizinin “Rəşt-Astara” dəmir yolu hissəsinin tikintisinə mümkün qədər tez başlanacağına ümid edir.

Avtosfer.az “Report”a istinadən xəbər verir ki, bunu Rusiyanın xarici işlər naziri Sergey Lavrov bu gün Tehranda iranlı həmkarı Abbas Əraqçi ilə birgə mətbuat konfransı zamanı deyib.

XİN başçısı qeyd edib ki, Rusiya tərəfi İranın “Rəşt-Astara” dəmir yolu xəttinin tikintisinə başlamazdan əvvəl bütün lazımi addımları atmasından məmnundur.

"Bu məqsədlə Rusiya ixrac kreditini ayıracaq. “Rəşt-Astara” hissəsi bizə çox mühüm addım atmağa imkan verəcək. Çünki bu, “Şimal-Cənub” dəhlizinin tam işə salınması üçün zəruri olan hissədir", - S.Lavrov bildirib.

Xatırladq ki, İran və Rusiya 2025-ci ilin martına qədər "Rəşt-Astara" dəmir yolu xəttinin tikintisinə dair müqavilə imzalamaq barədə razılığa gəliblər.

Ötən ilin mayın 17-də Rusiya və İran arasında “Şimal-Cənub” layihəsi çərçivəsində Azərbaycan və İran arasında "Rəşt-Astara" yolunun Fars körfəzi limanlarına keçidi təmin edəcək hissəsinin birgə tikintisinə dair saziş imzalanıb. Layihənin ümumi dəyəri 1,6 milyard avrodur. Bu hissənin tikintisinə 1,3 milyard avro məbləğində dövlətlərarası kredit ayrılacaq. Sənədə əsasən, Moskva və Tehran mal və xidmətlərin layihələndirilməsi, tikintisi və tədarükünü birgə maliyyələşdirəcək.

Tikinti işlərinin 2027-2028-ci illərdə başa çatdırılması gözlənilir.