Rusiya və İran Rəşt-Astara dəmir yolu xətti layihəsinin həyata keçirilməsinə başlayacaq

"Şimal-Cənub" beynəlxalq nəqliyyat dəhlizi çərçivəsində Rəşt-Astara dəmir yolu xətti layihəsinin praktiki icrasına 2026-cı il aprelin 1-dən başlanacaq.

Avtosfer.az TASS-a istinadən xəbər verir ki, bu barədə Rusiyanın energetika naziri Sergey Tsivilyev Rusiya və İran arasında ticari-iqtisadi əməkdaşlıq üzrə Hökumətlərarası Komissiyanın işi çərçivəsində bildirib.

Onun sözlərinə görə, tərəflər layihənin başlanmasını ləngidən bütün mübahisəli məsələləri həll edə biliblər:

"Şimal-Cənub" dəhlizi təkcə enerji deyil, həm də nəqliyyat dəhlizidir. Onunla Rəşt-Astara dəmir yolu xəttinin tikintisi əlaqəlidir. Biz demək olar ki, bütün məsələləri, o cümlədən torpaqların rəsmiləşdirilməsi və güzəştlərin əldə edilməsinə dair məsələləri işləyib hazırlamışıq. Aprelin 1-də Rusiyada nəqliyyat həftəsində bu layihənin reallaşdırılmasına başlanılması barədə yekun razılaşmanın olacağına razılaşdıq".