Rusiyada yanacaqdoldurma məntəqəsində silahlı insident

Rusiyanın Sankt-Peterburq şəhərindəki yanacaqdoldurma məntəqələrindən birində atəş açan şəxs saxlanılıb.

Avtosfer.az xəbər verir ki, bu barədə Rusiya Daxili İşlər Nazirliyinin regional mətbuat xidməti məlumat yayıb.

İdarənin məlumatına görə, polisə Karaçayevskaya küçəsindəki 31 nömrəli binanın yaxınlığında yerləşən yanacaqdoldurma məntəqəsində atışma olması barədə məlumat daxil olub. Hadisə yerinə gələn hüquq-mühafizə orqanlarının əməkdaşları 53 yaşlı şübhəli şəxsi saxlayıblar.

İlkin məlumatlara görə, şübhəli şəxs məntəqədə 40 yaşlı sürücü ilə mübahisədən sonra avtomobili idarə edərkən tapançasından digər sürücünün nəqliyyat vasitəsinə bir neçə dəfə atəş açıb.

Saxlanılan şəxs polis bölməsinə aparılıb və barəsində inzibati protokol tərtib edilib. Silah müsadirə olunub. Hadisə nəticəsində xəsarət alan olmayıb.

Hazırda cinayət işinin başlanılması məsələsinə baxılır.