Sürücüləri çətin vəziyyətdə qoyan yol: "Arakəsmə var, YOL NİŞANLARI YOXDUR" - VİDEO

Bakının mərkəzi prospektlərindən birində yol nişanlarının qoyulmaması sürücülərin narazılığına səbəb olub.

Avtosfer.az oxu.az-a istinadən xəbər verir ki, söhbət Ziya Bünyadov prospektinin köməkçi yolundan Böyükşor-Pirşağı istiqamətinə gedən yolla Müzəffər Nərimanov küçəsinin kəsişməsindən gedir.

"Yolda arakəsmə yaradıblar, amma heç bir nişan qoymayıblar. Bu isə qəzaları qaçılmaz edir, xüsusən də gecə saatlarında",- deyə şikayətdə bildirilib.

Məsələ ilə bağlı Azərbaycan Avtomobil Yolları Dövlət Agentliyinin (AAYDA) Mətbuat Xidmətinin rəhbəri Anar Nəcəfli açıqlamasında yolda işlərin yekunlaşmadığını bildirib.

"Həmin ərazidə günün pik saatlarında tıxac olduğu üçün nəqliyyat vasitələri bir-birlərinə mane olurlar. Ərazidə nəqliyyat axınını ayırmaq üçün nəzərdə tutulan iki adacıq quraşdırılıb. İşlər hələ yekunlaşmayıb. Yaxın günlərdə ərazidə müvafiq nişanların quraşdırılması və digər məsələlər öz həllini tapacaq və səsləndirilən problem aradan qaldırılacaq", - deyə A.Nəcəfli vurğulayıb.