Tbilisi-Batumi avtomobil yolu cari ildə tam istifadəyə veriləcək

Trans-Xəzər Beynəlxalq Nəqliyyat Marşrutunun (Orta Dəhliz) strateji əhəmiyyətinin artması fonunda region ölkələrinin yol-nəqliyyat infrastrukturunun modernləşdirilməsi prosesi sürətlənib. Bu çərçivədə Gürcüstan Respublikası da həm beynəlxalq, həm də yerli əhəmiyyətli avtomobil yollarının yenidən qurulmasını həyata keçirir.

Avtosfer.az xəbər verir ki, bu barədə Gürcüstanın regional inkişaf və infrastruktur naziri Revaz Soxadze bəyan edib.

Nazir vurğulayıb ki, Gürcüstan irimiqyaslı yol infrastrukturu layihələrini icra etməklə qlobal logistika zəncirində etibarlı və rəqabətədavamlı tranzit tərəfdaşı statusunu regional səviyyədə bir daha təsdiqləyir.

R.Soxadzenin sözlərinə görə, ölkə daxilində eyni vaxtda bir neçə strateji yol layihəsinin tikintisi davam etdirilir. Strateji əhəmiyyət kəsb edən Tbilisi-Batumi sürətli avtomobil yolunun cari ilin sonunadək tam həcmdə istismara verilməsi nəzərdə tutulur. Bununla yanaşı, Kaxeti regionu istiqamətində tikinti işləri fəal fazaya qədəm qoyub. Həmçinin beynəlxalq tranzit yükdaşımalarının optimallaşdırılması və paytaxtın nəqliyyat yükünün azaldılması baxımından xüsusi çəkiyə malik olan Tbilisi dolama avtomobil yolunun inşasına başlanılır.

Nazir regional logistikaya təsir edəcək digər layihələrə də toxunaraq, Sarpi tuneli layihəsinin icra ediləcəyini, regionun mürəkkəb relyefə malik mühəndislik strukturlarından sayılan Kobi-Kveşeti və Qveleti-Lars yol hissələrinin tikintisinin isə hazırda fəal şəkildə davam etdirildiyini diqqətə çatdırıb./xalqezeti