Torpaq sürüşməsi 6 kəndlə gediş-gəlişi çətinləşdirdi - FOTOLAR - VİDEO - YENİLƏNİB

Lənkəranın Hirkan-Daştatük-Biləsər avtomobil yolunda torpaq sürüşməsi davam edir.

Baku TV-nin xəbərinə görə, sürüşmə zonası daha da genişlənib, yolda iri çatlar və çökmələr yaranıb. Ərazidəki irigövdəli ağaclardan biri də kökündən qoparaq aşıb.

Hazırda yolun hər iki hərəkət istiqaməti yararsız vəziyyətə düşdüyündən sürücülər həmin hissədən çətinliklə keçirlər.

Sakinlərin sözlərinə görə, bu yol yeddi kəndin əsas nəqliyyat bağlantısıdır və alternativ yol yoxdur.

"Yol sürüşür, ağaclar da aşıb. Bu vəziyyətdə hərəkət etmək çox təhlükəlidir. Yuxarı kəndlərə çıxmaq mümkün deyil", - deyə sakinlər bildiriblər.

***11:53

Lənkəran rayonunda torpaq sürüşməsi baş verib. 

Avtosfer.az qafqazinfo-ya istinadən xəbər verir ki, sürüşmə 6 yaşayış məntəqəsini birləşdirən Hirkan–Daşdatük–Biləsər avtomobil yolunda hərəkəti çətinləşdirib.

Yol örtüyündə dərin yarıqlar və çökmələr əmələ gəlib. Ərazidə yerləşən iri ağaclardan biri də kökündən çıxaraq aşıb. 

Yerli sakinlərin sözlərinə görə, bu yol bir neçə kənd üçün əsas nəqliyyat xəttidir və alternativ yol mövcud deyil. Hazırda yolun hər iki istiqaməti demək olar ki, istifadəyə yararsız hala düşdüyündən sürücülər həmin hissədən böyük çətinliklə keçirlər.

Məsələ ilə bağlı Azərbaycan Avtomobil Yolları Dövlət Agentliyindən (AAYDA) bildirilib ki, ərazi nəzarət altındadır. Yaxın günlərdə geoloji araşdırmalar aparıldıqdan sonra bərpa işləri ilə bağlı təkliflər hazırlanaraq aidiyyəti qurumlara təqdim ediləcək.