Trabzondan gələn gəmi Soçi limanına buraxılmadı

Trabzon şəhərindən gələn bərənin Rusiyanın Soçi limanına girişinə icazə verilməyib və iki gündən çox gözlədikdən sonra gəmi Türkiyəyə qayıdır.

Avtosfer.az xəbər verir ki, “SVS Shipping” MMC rəhbərliyinin məlumatına görə, iki gün yarım gözləyən bərənin Soçi limanına girişinə icazə verilməyib və gəmi Rusiyada sərnişinləri düşürmədən Trabzona qayıdır.

Noyabrın 6-da Trabzondan hərəkət edən “Seabridge” bərəsinin Rusiyaya giriş icazəsinin olmaması və ərazidə təlim məşqləri keçirilməsi səbəbindən Soçi limanına girişinə icazə verilməyib. Rusiya Tur Operatorları Assosiasiyasının məlumatına görə, gəmidə təxminən 20 sərnişin olub və onların əksəriyyəti Rusiya vətəndaşdır.

Krasnodar diyarı administrasiyası təhlükəsizlik məsələlərinin həll olunmaması səbəbindən Soçi ilə Türkiyənin Trabzon şəhəri arasında müntəzəm bərə xidmətinin açılmasını vaxtından əvvəl hesab etdiyini qeyd edib.

Soçi ilə Trabzon arasında bərə xətti 1993-cü ildən 2011-ci ilə qədər fəaliyyət göstərib. Marşrutun 2024-cü ilin dekabrında bərpa edilməsi planlaşdırılırdı, lakin həmin plan dəfələrlə təxirə salınıb.