Vətəndaş "Xəzər Lizinq" MMC-dən şikayətçidir - VİDEO

Taksi fəaliyyəti üçün günlük avtomobil icarəyə götürən Beyləqan sakini Mətin Əlizadə lizinq şirkətindən şikayətçidir.

Avtosfer.az xəbər verir ki, Mətin Əlizadə iddia edir ki, 2021-ci ildə "Xəzər Lizinq" MMC-dən ''99-PX-793'' dövlət qeydiyyat nişanlı avtomobili gündəlik 25 manata götürüb:

''Bir ay ərzində maşını sürdüm, sonra qəza elədim. Maşında başqa texniki problemlər də oldu. Dedilər, apar servisə. Verdim servisə, “Opel” verdilər. Sonra onu da qaytardım. Mənə dedilər ki, sənin o maşınlarla əlaqən yoxdur. Üstündən 4 il keçmişdi, mənə məktub gəldi ki, 14 min borcun var. Mən də şikayət elədim. Sonra, 2026-da məktub gəlib ki, sizin 17979 manat borcunuz var''. 

Müsahibimizin sözlərinə görə, bundan sonra uzun müddət məsələ ilə bağlı ona hər hansı tələb irəli sürülməyib. Məsələni mürəkkəbləşdirən əsas məqam tərəflər arasında illər əvvəl baş verdiyi deyilən hadisənin bu gün yenidən gündəmə gəlməsidir.

Biz də qarşı tərəfin mövqeyini öyrənmək üçün "Xəzər Lizinq" MMC ilə əlaqə saxlamağa çalışdıq. Lakin zənglərimizə cavab verilmədi, şirkətin fəaliyyət göstərdiyi ofisin ünvanını da müəyyənləşdirmək mümkün olmadı. Şikəyətçi deyir ki, başına gələnlərlə bağlı məhkəməyə müraciət edəcək.