Yasamalda əsas küçələrdən birinin qazılmasına AYDINLIQ GƏTİRİLDİ

Bakının Yasamal rayonundakı əsas küçələrdən birinin qazılması sakinlərin işini çətinə salıb.

Avtosfer.az oxu.az-a istinadən xəbər verir ki, söhbət Abbas Mirzə Şərifzadə küçəsinin metronun "İnşaatçılar" stansiyasının qarşısındakı hissəsindən gedir.

Ərazidə "Azəristiliktəchizat" ASC tərəfindən təmir işləri aparılır. Hərəkətin intensiv olduğu ərazidə yolun qazılması nəqliyyat vasitələrinin hərəkətində ciddi çətinlik yaradır.

Məsələ ilə bağlı "Azəristiliktəchizat" ASC-nin mətbuat katibi Elvin Basqallı bildirib ki, aparılan işlər payız-qış mövsümünə hazırlıqla əlaqədardır.

"Aparılan sınaq-yoxlama işləri zamanı qeyd olunan ünvanda magistral xətdə axıntı qeydə alınıb və xəttin təmir-bərpası məqsədilə qazıntı işləri aparılıb. Hazırda işlər davam etməkdədir. Ən qısa müddətdə, yəni yeni dərs ili başlayana kimi, bütün işlərin yekunlaşması üçün intensiv iş aparılır. İşlər yekunlaşdıqdan sonra yol təmir olunacaq", - deyə E.Basqallı qeyd edib.