Zelenski İlham Əliyevlə təyyarə qəzasını müzakirə etdi

Ukrayna lideri Volodimir Zelenski Davosda keçirilən Ümumdünya İqtisadi Forumu çərçivəsində Azərbaycan Prezidenti İlham Əliyevlə görüşüb. Görüşdə tərəflər Azərbaycan Hava Yollarına (AZAL) məxsus təyyarənin Aktau yaxınlığında qəzaya uğramasını müzakirə ediblər.

Avtosfer.az xəbər verir ki, bu barədə Zelenski "Telegram" kanalında yazıb.

O bildirib ki, təyyarə qəzası ilə bağlı Əliyevə bir daha başsağlığı verib.

"Fəlakət yerindən dəlillər göz qabağındadır, Rusiyanı həqiqəti deməyə məcbur etmək lazımdır", - Zelenski ifadə edib. 

Xatırladaq ki, ötən ilin dekabrın 25-də Qazaxıstanın qərbində yerləşən Aktau şəhəri yaxınlığında Bakıdan Qroznıya  uçan Azərbaycan Hava Yollarına məxsus "Embraer 190" təyyarəsi  qəzaya uğrayıb. Təyyarədə 5 ekipaj üzvü və 62 sərnişin olub. Hadisə nəticəsində 38 nəfər ölüb, 29 nəfər isə sağ qalıb.