Vəsiqəsi olmayanlar dəniz kənarında maşın sürə bilər? - İZAH - VİDEO

Bəzən sürücülük hüququ olmayan şəxslər idarəetmə bacarıqlarını inkişaf etdirmək üçün yaxınlarına məxsus avtomobilləri müəyyən yerlərdə idarə edirlər. Avtosfer.az-ın məlumatına görə, bu mövzu ilə bağlı sosial şəbəkə istifadəçilərindən biri videogörüntü paylaşıb. O, bildirib ki, yeni qaydalara əsasən, sürücülük hüququ olmayan şəxsin dəniz kənarında avtomobil idarə etməsi 260 manat məbləğində cərimə ilə nəticələnir.
Qeyd edək ki, bu, yeni tətbiq olunmuş qayda deyil. Ümumi istifadədə olan istənilən yol sahəsində – istər dənizkənarı ərazilərdə, istərsə də park yerlərində sürmə vərdişləri öyrənmək qanunla qadağandır. Paytaxtda xüsusilə Bayraq Meydanı, Olimpiya Stadionunun ətrafı və dənizkənarı zonalar sürmə vərdişləri üçün istifadə olunsa da, bu ərazilər ümumi istifadədə olan yol sahələri sayılır.
Xatırladırıq ki, belə yerlərdə sürücülük hüququ olmadan avtomobil idarə etmək qayda pozuntusu hesab olunur və inzibati cərimə tətbiq edilir. Sürücülük bacarıqlarını təhlükəsiz və qanuni şəkildə inkişaf etdirmək istəyən şəxslərə peşəkar təlimçilərin xidmətindən yararlanmaq tövsiyə olunur.

Fərid