Zolaq bitən zaman buna əməl etməsəniz cərimələnə bilərsiniz - VİDEO

Nəqliyyat vasitələrinin hərəkəti zamanı yol verməklə bağlı qaydalar sürücülər üçün vacib məqamdır və bu qaydalar təkcə "Stop" və "Yol ver" nişanlarının olduğu yerlərlə məhdudlaşmır. Bir çox sürücü üstünlük nişanlarının olmadığı hallarda yol vermirlər ki, bu da qəza riskini artırır. Xüsusilə, hərəkət zolağının bitdiyi yerlərdə bu qaydaya əksər sürücü əməl etmir.

Bəzi yolların müəyyən hissələrində daralma baş verdikdə, sağ və ya sol zolağın nişanlanma xətti ilə bitməsinin şahidi oluruq. Bu halda, həmin zolaqda olan sürücülər məcburi şəkildə qonşu zolağa keçməli olurlar. Lakin bir çox sürücü zolağı dəyişərkən yol verməli olduğunun fərqində olmur. Nəticədə, eyni istiqamətdə hərəkət edən digər nəqliyyat vasitələri üçün təhlükəli vəziyyət yaranır.

"Yol hərəkəti haqqında" qanunun 42-ci maddəsinə əsasən, sürücü hərəkət istiqamətini dəyişərkən eyni istiqamətdə hərəkət edən nəqliyyat vasitələrinə yol verməlidir. Bu qayda o deməkdir ki, zolaq bitdikdə sürücü öncə dönmə işığını yandıraraq digər sürücüləri xəbərdar etməli, daha sonra isə heç kimə mane olmayacağına əmin olduqdan sonra hərəkət trayektoriyasını dəyişməlidir.

Belə qaydaların düzgün yerinə yetirilməsi həm yol-nəqliyyat hadisələrinin qarşısını almağa kömək edir, həm də hərəkətin daha təhlükəsiz və nizamlı olmasını təmin edir. Bu səbəbdən, bütün sürücülər yol hərəkəti qaydalarına diqqətlə əməl etməli, zolaq dəyişmə zamanı xüsusilə ehtiyatlı olmalıdırlar.​​​​​​