Qarşıdan gələn maşına yol verməyən sürücü qəza şəraiti yaratdı - VİDEO

Xırdalan şəhərində yol hərəkəti qaydasını pozan sürücü kameraya düşüb. Avtosfer.az xəbər verir ki, hadisə Heydər Əliyev prospekti ilə Mehdi Hüseynzadə küçəsinin kəsişməsində qeydə alınıb. Belə ki, 90-XE-235 qeydiyyat nişanlı "Hyundai" markalı avtomobilin sürücüsü yolayrıcının keçilməsi qaydasını kobud şəkildə pozub. O, sola dönən zaman qarşıdan gələn "Mercedes Vito" markalı avtomobilin önünə çıxaraq ona qəza şəraiti yaradıb. Təhlükə ilə üzləşən sürücü sərt tormoz verərək qəzadan son anda yayınıb.

"Yol hərəkəti haqqında" qanunda qeyd olunub ki, sola dönən sürücü qarşıdan düzünə və sağa hərəkət edən nəqliyyat vasitələrinə yol verməlidir.

Bu qayda pozuntusunu törədən sürücü İnzibati Xətalar Məcəlləsinin 327.2-ci maddəsi ilə 3 bal 100 manat məbləğində cərimə oluna bilər.

Fərid