Qırmızıda keçən skuter sürücüsü maşına çırpılmaqdan son anda xilas oldu - VİDEO

Paytaxtın Azərbaycan prospektində qayda pozan skuter sürücüsü təhlükəli vəziyyət yaradıb.

Avtosfer.az-ın məlumatına görə, hadisə iyulun 18-də saat 12:07 radələrində qeydə alınıb. Görüntülərdən görünür ki, “Wolt” çatdırılma şirkətinin kuryeri idarə etdiyi skuterlə işıqforun qadağanedici işığında hərəkətini davam etdirərək nizamlanan yolayrıcına daxil olur. Bu zaman icazəverici işıq siqnalı ilə hərəkət edən minik avtomobili ilə toqquşma təhlükəsi yaranır.

Avtomobil sürücüsü vaxtında əyləcə basdığı üçün qəzanın qarşısı son anda alınır.

Qeyd edək ki, “Yol hərəkəti haqqında” Qanunun tələblərinə əsasən, nizamlanan yolayrıcında hərəkət iştirakçıları işıqforun və ya nizamlayıcının göstərişlərinə əməl etməyə borcludurlar. Qadağanedici işıq siqnalında yolayrıcına daxil olmaq yol vermək vəzifəsini aradan qaldırmır və üstün hərəkət hüququna malik nəqliyyat vasitələrinin hərəkətinə maneə yaratmaqla yol-nəqliyyat hadisəsinə səbəb ola bilər.

Nərmin