Skuter sürücüləri maşınların üzərinə sürüb həyatlarını təhlükəyə atdılar - VİDEO

Son illər Bakıda elektrik skuterlərin sayı sürətlə artmaqdadır. Bu nəqliyyat vasitələri şəhər içində çevik və praktik hərəkət imkanı yaratsa da, eyni zamanda bir sıra ciddi təhlükələrə də yol açır. Təəssüf ki, skuterdən istifadə edən şəxslər arasında yol hərəkəti qaydalarına əməl etməyənlər də az deyil. Sürücülərin bir hissəsi düşünür ki, bu nəqliyyat vasitəsi ilə yolda istədikləri kimi hərəkət edə bilərlər. Bu isə həm onların özləri, həm də digər yol iştirakçıları üçün real təhlükə yaradır.

Növbəti qayda pozan skuter sürücüləri paytaxtın Mehdi Hüseyn küçəsində müşahidə olunub. Avtosfer.az-a daxil olan videogörüntüdə üç skuter sürücüsünün kobud qayda pozuntusu etdiyi açıq-aydın görünür. Belə ki, onlar yolun əksi istiqamətində axına qarşı sürətlə hərəkət ediblər.

Görüntünü qeydə alan avtomobilin sürücüsü təhlükənin qarşısını almaq üçün vaxtında reaksiya verərək digər zolağa keçməyə məcbur olub.

Qeyd edək ki, elektrik skuter istifadəçiləri də digər yol hərəkəti iştirakçıları ilə eyni məsuliyyəti daşıdıqlarını unutmamalı və qanunlara riayət etməlidirlər.

Fərid