Sürücü maşını pandusun önündə saxlayıb getdi – 10-ZY-810 - FOTO

Paytaxtın Binəqədi rayonunda piyadaların hərəkəti üçün nəzərdə tutulmuş hissə avtomobil tərəfindən tutulub.

Avtosfer.az xəbər verir ki, hadisə rayonun Adil Məmmədov küçəsində qeydə alınıb.

Şahidlərin sözlərinə görə, 10-ZY-810 dövlət qeydiyyat nişanlı “Hyundai” markalı avtomobil səkidən eniş hissəsinin qarşısında park edilib. Nəticədə piyadaların, xüsusilə uşaq arabası ilə hərəkət edən şəxslərin və fiziki məhdudiyyətli vətəndaşların yolu bağlanıb. Digər tərəfdən sürücü avtomobili arakəsmədən 15 metr məsafədə saxlamalı olduğunun da fərqində deyil.

Görüntülərdən aydın olur ki, nəqliyyat vasitəsi məhz pandusun qarşısını kəsib. Bu cür ərazilər hərəkəti məhdud vətəndaşların təhlükəsiz hərəkəti üçün nəzərdə tutulur.

Sakinlər bildirir ki, bu cür park etmə halları tez-tez təkrarlanır və ərazidə piyadaların hərəkətinə ciddi çətinlik yaradır. Onların sözlərinə görə, sürücülər piyada infrastrukturunu nəzərə almadan avtomobillərini saxlayırlar.

Qeyd edək ki, qaydalara əsasən piyadaların hərəkəti üçün nəzərdə tutulan hissələrin tutulması inzibati məsuliyyət yaradır.

Səfər