Sürücünün yola atdığı közərmiş siqaret kötüyü motosikletçinin üzərinə düşdü - VİDEO

Paytaxtın Babək prospektində təhlükəli anlar yaşanıb.

Avtosfer.az-ın məlumatına görə, hadisə bir neçə gün əvvəl axşam saatlarında qeydə alınıb.

Görüntülərdən məlum olur ki, hərəkətdə olan “BYD” markalı avtomobilin sürücüsü siqareti çəkib qurtardıqdan sonra közərmiş siqaret kötüyünü avtomobildən yolun hərəkət hissəsinə atıb. Həmin an kötük arxadan hərəkətdə olan motosiklet sürücüsünün üzərinə düşüb.

Xoşbəxtlikdən motosikletçi qoruyucu dəbilqədən istifadə etdiyindən hadisə xəsarətlə nəticələnməyib. Bundan sonra o, avtomobilə yaxınlaşaraq sürücünün bu hərəkətinə iradını bildirib.

Qeyd edək ki, nəqliyyat vasitəsindən yola siqaret kötüyü və digər əşyaların atılması digər hərəkət iştirakçılarının həyatı üçün təhlükə yarada, həmçinin yol-nəqliyyat hadisəsinə səbəb ola bilər. Bu cür hərəkətlərə yol verən sürücülər qanunvericiliyə uyğun olaraq inzibati məsuliyyət daşıyırlar.

Nərmin