Taksi dayanacağını zəbt edən sürücü mübahisə də etdi - VİDEO

Paytaxtın “Memar Əcəmi” metrosunun yaxınlığında dayanma qaydalarını pozan sürücülər qeydə alınıb.

Bu barədə izləyicilərdən biri Avtosfer.az-ın “Instagram” səhifəsinə video göndərərək məlumat verib. Hadisənin iyunun 30-da səhər saatlarında baş verdiyi bildirilir.

Kadrlardan görünür ki, 10-LG-505 dövlət nömrə nişanlı “Mercedes” markalı və 99-FD-891 dövlət qeydiyyat nişanlı “Mercedes” markalı avtomobillərin sürücüləri nəqliyyat vasitələrini taksi dayanacağı nişanının təsir zonasında saxlayıblar. Nəticədə əraziyə gələn taksi sürücüsü dayanacağa tam şəkildə daxil ola bilməyib.

Şikayətçinin sözlərinə görə, o, sürücülərdən birinə yaxınlaşaraq qayda pozuntusu ilə bağlı iradını bildirib. Bu zaman tərəflər arasında mübahisə yaranıb. İzləyicinin iddiasına əsasən, mübahisədən sonra sözügedən sürücü maşını dayanacaqda saxlayaraq ərazidən kənarlaşıb.

Qeyd edək ki, taksi dayanacaqlarında digər nəqliyyat vasitələrinin dayanması və ya parklanması həmin ərazidən istifadə edən sürücülər üçün maneə yaradır, həmçinin sərnişinlərin minib-düşməsi zamanı əlavə təhlükə formalaşdırır.

Nərmin