Tapmacaya çevrilən dairə: Sürücülər Allah ümidinə gedirlər - VİDEO

"Sədərək" ticarət mərkəzində hərəkətin təşkilində olan çatışmazlıqlar sürücüləri çətin vəziyyətə salıb. Bu barədə sürücülərdən biri qeydə aldığı videonu redaksiyamızın qaynar xəttinə göndərib. Avtosfer.az xəbər verir ki, ticarət mərkəzinin çıxışına yaxın olan bir hissədə dairəvi hərəkət təşkil olunub. Lakin heç bir istiqamətdə yol nişanları quraşdırılmayıb. Yalnız video qeydə alınan istiqamətdə asfalt üzərinə 1.13 "yol ver" nişanlanma xətləri tətbiq edilib. Bu nişanlanma xəttinin isə 2.4 "yol ver" nişanı olmadan tətbiq edilməsinin heç bir önəmi yoxdur. Yəni, həmin nişanlanma xəttinin 2.4 yol nişansız heç bir hüquqi qüvvəsi yoxdur. Buna baxmayaraq, tətbiq edilən nişanlanma xətti sürücüləri çaş-baş salır.

Ümid edirik ki, aidiyyəti qurumlar həmin ərazidə sürücülərin təhlükəsizliyi üçün müvafiq nişanlar və nişanlanma xətləri tətbiq edərək rahat hərəkət şəraiti təşkil edəcək.

Fərid