Şəhərin mərkəzində təhlükə saçan motosikletçi qəza törədib qaçdı - REAL VİDEO

Paytaxtın Füzuli küçəsində qayda pozan sürücü qəzaya səbəb olub.

Avtosfer.az xəbər verir ki, hadisə fevralın 5-də saat 20:20 radələrində qeydə alınıb.

Kadrlardan görünür ki, yalnız düz istiqamətdə hərəkətə icazə verilən zolaqda dayanan bir neçə motosiklet sürücüsü yolayrıcına daxil olaraq sola dönüb. Bu zaman onlar yolayrıcına daxil olmaq istəyən 99-MY-485 dövlət nömrə nişanlı “Toyota Prius” markalı avtomobilin qarşısına qəfil çıxaraq qəza təhlükəsi yaradıblar.

“Prius” sürücüsü toqquşmanın qarşısını almaq üçün dayanıb. Lakin həmin vaxt arxadan gələn digər motosiklet sürücüsü nişanlanma xəttinin tələbini pozaraq sol zolağa keçib və dayanmış avtomobilə çırpılıb.

İddialara görə, qəzaya səbəb olan motosiklet sürücüsü hadisə yerindən uzaqlaşıb.

Nərmin