Bu nişanlar cəriməyə səbəb olur; Sürücü icra hakimiyyətinin etmədiyini özü etdi - VİDEO

Paytaxtın əhalinin sıx yaşadığı rayonlarından biri olan Nizamidə sürücülər hər gün təkrarlanan, lakin çoxlarının diqqətindən yayınan bir problemlə qarşılaşır.
Avtosfer.az xəbər verir ki, Məhsəti Gəncəvi küçəsində yol nişanları budaqların arasında gizlənərək sürücülər üçün ciddi çaşqınlıq yaradır.
Sosial şəbəkələrdə qeyd edilən şikayətə görə, həmin küçədə ağacların sıx budaqları yol nişanlarının üzərini tamamilə örtüb. Sürücülər məcburi hərəkət istiqamətini və ya parklanma qaydalarını müəyyən edən nişanları vaxtında görə bilmir.
Məsələ ilə bağlı sürücülərdən biri vəziyyətin ciddiliyini belə ifadə edir: “Hər gün bu yoldan istifadə edirəm. Nişanın yerini əzbər bildiyim üçün problem yaşamıram, amma şəhərə bələd olmayan biri üçün bu əsl tələdir. Bir dəfə dözməyib maşından düşdüm, əlimin çatdığı budaqları kəsdim ki, heç olmasa nişanın bir hissəsi görünsün. Amma yuxarıdakı budaqlara gücüm çatmadı”.
Qeyd edək ki, bu problem təkcə Məhsəti Gəncəvi küçəsinə xas deyil. Paytaxtın bir çox ərazisində oxşar mənzərəyə rast gəlmək mümkündür. Yay mövsümündə daha çox yaşansa da bu gün də sıxlaşan ağac budaqları nişanları görünüş məsafəsini xeyli azaldır. Bu isə sürücülərin diqqətini yayındıraraq onları məcburi qayda pozuntusuna sövq edə bilər. Ani tormozlama, gözlənilməz manevrlər və ya yanlış zolağa daxilolma kimi hallar məhz belə kiçik bir səhlənkarlığın nəticəsi olaraq qəza şəraiti yaradır.

Fidan