Bakı metrosunun daha 4 stansiyasında musiqi və ingilis dilində səsləndirmə olacaq

Avtosfer.az-ın məlumatına görə, metronun 4 stansiyasında sərnişinlərə bildirişlər musiqi parçası ilə birlikdə iki dildə səsləndiriləcək. 

Qurumun mətbuat xidmətinin rəhbəri Nəsimi Paşayev “Report”a açıqlamasında faktı təsdiq edib. Onun sözlərinə görə, bununla da musiqi parçası səsləndirlən stansiyaların sayı 24-ə çatıb: “İndiyə qədər bizim 25 stansiyadan 5-də musiqi və səsləndirmə yox idi. Onlar “Avtovağzal”, "Memar Əcəmi" (Bənövşəyi xətt) stansiyası, “Cəfər Cabbarlı”, “Şah ismayıl Xətai” və “Bakmil” stansiyalarıdır. Artıq bu gündən “Bakmil” istisna olmaqla 4 stansiyada həm musiqi var, həm də Azərbaycan və İngilis dilində stansiya adları və anonslar verilir”.

“Metropoliten” sözçüsü səslənən musiqi parçalarının hansı əsərlərdən olduqlarını da açıqlayıb: “Şah İsmayıl Xətai” stansiyasında Fikrət Əmirovun “1001 gecə” baletindən “Cəfər Cabbarlı” stansiyasında Fikrət Əmirovun “Azərbaycan kapriççiosu”ndan, “Avtovağzal” stansiyasında Üzeyir Hacıbəyovun “Arazbari”sindən, "Memar Əcəmi" (Bənövşəyi xətt) stansiyasında isə Rauf Hacıyevin “Leyla”sından fraqment səslənir”.