Şuşanın “Tarqovı”sı adlanan Qarabağ küçəsində nələr dəyişəcək? - FOTO

Şuşanın Qarabağ küçəsini tez-tez Bakının “Tarqovı”sı (Nizami küçəsinin piyadalar zonası) ilə müqayisə edirlər.

Avtosfer.az xəbər verir ki, nəzərdə tutulan küçələr arasında xeyli oxşarlıqlar var. Belə ki, hər iki küçə piyada yönümlüdür, hər ikisində ticarət, kafe və restoranların inkişafı planlaşdırılır, küçə mebelləri, işıqlandırma və abadlıq yüksək səviyyədədir. Həm yerli sakinlər, həm də turistlər üçün cəlbedici ictimai məkan kimi nəzərdə tutulublar.

Amma Qarabağ küçəsi əslində yeni küçə deyil - XIX əsr Şuşasının məşhur Şeytanbazarının yenidən doğuluşudur. “Tarqovı” da 150 ildən artıq tarixə malik şəhər küçəsidir.

Bakının “Tarqovı”sı kimi, Şeytanbazar da Şuşanın ən canlı, ən gur və ən səs-küylü ticarət mərkəzi idi. Hər iki küçənin tarixi inkişaf yolu bir-birinə çox bənzəyir.

Adları da eyni məna daşıyır. Bakıda əhali arasında "Torqovaya" - yəni "Ticarət küçəsi" adı işlənirdi. Şuşada isə həmin qaynar ticarət məkanı xalq təxəyyülünün yaratdığı obrazlı bir adla tanınırdı - Şeytanbazar!

Gələcəkdə burada mağazalar, kafelər, mədəniyyət məkanları və daimi sakinlər çoxalsa, Qarabağ küçəsi Şuşanın ən canlı şəhər məkanlarından birinə çevrilə bilər.

Lakin bu küçə yalnız turistlər üçün deyil, burada yaşayan insanlar üçün də gündəlik həyatın bir hissəsi olmalıdır. Ən əsası isə, Qarabağ küçəsi başqasını təqlid etməsin. O, özünəməxsus Qarabağ ruhunu daşıyan, tarixi Şeytanbazar ənənəsini müasir şəhər həyatında yaşadan məşhur piyada küçəsi kimi tanınsın.

Səfər