"BMW M3"-ün yubiley versiyası - FOTO

"BMW" şirkəti sedan "M3"-ün xüsusi versiyasını hazırlayıb. Avtomobil "30 Years M3" adı alıb və modelin 30 illik yubileyi münasibətilə istehsal edilib. Brendin mətbuat xidmətinin məlumatına görə, bu modeldən cəmi 500 ədəd istehsal ediləcək. Avtosfer.az auto.az-a istinadən bildirir ki, yeniliyin banı "Macao Blue" metal rəngində olacaq. Xüsusi versiya "30 Years M3" baza variantında "Competition" paketi ilə təchiz ediləcək ki, bu, adi "BMW M3" üçün yalnız opsiya qismində əlyetərlidir. Bu paket mühərrikin gücünü 19 a.g. artırır və onu 450 at gücü edir. "Competition" paketinə adaptiv "M" asma, yeni yaylar, amortizatorlar və stabilizatorlar da daxildir. Avtomobildə "Comfort", "Sport" və "Sport+" rejimləri, o cümlədən "DSC" sistemi yenidən tənzimlənib. Opsional olaraq iki muftalı 7-pilləli sürət qutusu ilə təchiz edilən "BMW M3 30 Years" 100 km/saata 4 saniyəyə sürətlənir ki, bu da standart versiyadan 0,1 saniyə tezdir.